Poesia, emocions, seuva e hèitas Reclams
📚 Descobritz lo recuelh de poèmas esmavent de Tresià Pambrun
Tresià Pambrun que nos revèla lo son univèrs poetic. Los mots que corren, virolejan, dançan, pintran paisatges. Que parlan deu monde ordinari, qui càmbia, encanta o qui hè mau. Totun, la lenga que nos pòrta tot shuau de cap au saunèi. Que volem? Significar lo reau o espia'u per ua paret de veire?
❤️ Que ns'agrada hèra: Los poèmas que son hòrts, pregonds, intenses dens l'emocion qui suscitan. Ua vertadèra reflexion sus çò qui ei la cultura e la lenga d'un pòble. Daubuns poèmas que mòstran au còp la fragilitat e la resisténcia de la poesia e fin finau de la pensada umana.
L'autor
Tresià Pambrun qu'ei nascuda en 1954 a Lorda. Qu'èra conselhèra pedagogica en lenga e cultura regionaus. Qu'ei tanben cantaira e contaira. La soa seria de contes entà mainatges, Los Òmis Petits, qu'a avut ua beròja escaduda. Mei largament, la sua òbra literària que hè pròva d'ua finessa e ua sensibilitat de las granas.
Libe bilingüe occitan, francés.
📰 La revista literària Reclams n°877
E haut, com cada cap d'an, qu'incrementam de 1 lo nombre d'annadas qui'ns separa de la vaduda de la nosta èra. Çò qui'ns va dar lo beròi resultat de 2026 ans. E com un hèit exprès, per un medish procès d'incrementacion, la nosta revista Reclams de qui'n hèm la reclama, que clama d'estar au son 877au numèro. Numèro qui, a trucas d'ac tornar díser qu'ac devetz saber, e complirà la vòsta hami d'apréner, de'vs divertir e mei que mei de passar un bon moment en lege'u. Shens desbrembar totun qu'ua navèra rubrica qui tractarà deus mites deus pòples deu monde e vienerà emberogir un flòc dejà plan guarnit.
Qu'ei possible a cada moment de s'abonar a la revista en linha.
Que podetz tanben aderir a l'associacion e atau participar a l'Amassada generau annau atau com aus grops de reflexion metut en plaça entà avançar sus las perspectivas de la revista literària mei vielha de França !
📰 ABC del saber, l’article deu mes
L’EVOLUCION DE LA SEUVA EN FRANÇA. QUINA COBÈRTA BOSCASSÈRA DENS LOS TEMPS ANCIANS, ADARA E DOMAN?