Lo prumèr libe feminista en occitan, un pauc de sciéncia e quauques rendetz-vos
📚 "Sul camin del feminisme", ua reflexion suu noste modèle sociau
Enter ensai e manuau, l'obratge que presenta dab sobrietat e simplicitat au còp çò qui ei lo genre (au delà de la biologia) e la situacion de la hemna en França. Un capítol gran qu'ei consacrat a las violéncias qui'us son hèitas, çò qui permet de préner la mesura deu subjècte. Fin finala, l'obratge qu'ei completat per informacions practicas. L'objectiu qu'ei clarament d'ajudar cadun e cadua a avançar cap tà un monde mei equilibrat, mei egalitari.
❤️ Que ns'agrada hèra: Qu'ei lo prumèr libe en occitan suu subjècte deu feminisme. Que permet de partatjar un vocabulari emplegat dens demieis avisats.
L'autor
Maud Séguier qu'ei neishuda en Aude en 1989. Après ua formacion au Conservatòri, Maud Séguier qu'ei cantaira, flabutista e percussionista, sustot dens los grops Camille en bal et Barrut, çò que'u mia dens mei d'un país deu monde. Que co-organiza tanben eveniments com lo hestau Festa Fogassa. Hòrt estacada aus drets de las personas, qu'a escrivut aqueth prumèr libe.
Ensai bilingüe francés e occitan lengadocian
📰 Lo numèro de L'ABC del saber: Sciéncia(s) que vien
Lo numèro navèth qu'arriba lèu. En esperant la soa parucion, que'vs convidam a (tornar) descobrir los articles e numèros precedents, tostemps disponibles e rics en contienuts passionants.
Aqueras publicacions que son lo parat de debàter de questions de societat; qu'esperam que poiràn estar l'objècte d'encontres e debats aus quaus participaram coma editor e dab lo·a·s autor·as.