Maud Séguier qu'ei neishuda en Aude en 1989. Dens lo son vilatge, las gents que parlavan occitan e la soa familha que la miava dens nombrós eveniments occitans. Que demora uei a Montpelhièr on a hèit los sons estudis e obtienut la soa licéncia LLCER (Langues, Littératures, Civilisations Étrangères et Régionales, parcours Occitan.)

L'occitan qu'ei fondamentau dens la soa vita professionau e tanben dens la soa vita associativa. Qu'organiza dab l'equipa de Lezards d'U lo hestenau Fèsta Fogassa qui met a l'aunor la lenga e la cultura occitanas dens lo vilatge de Mervièlh. Que hè partida de l'associacion Escòla Occitana d'Estiu qui organiza mei d'un eveniment dens l'annada, magèrment ua setmana d'immersion lingüistica qui permet de préner cors de lenga dens divèrs dialèctes e de participar a talhèrs, conferéncias e seradas en occitan:  https://eoe-oc.org/

Lo son engatjament que despassa l'occitan puishque luta entaus drets deus tribalhaires e tribalhairas dens Solidaires.

Après ua formacion au Conservatòri, Maud Séguier qu'ei cantaira e musiciana, flabutista e percussionista, sustot dens los grops Camille en bal e Barrut qui retrobam en çò d'Ox'ivent Produccion (https://oxivent.wpcomstaging.com/). Tota l'annada, que hè talhèrs de polifonias occitanas o d'escritura au près de publics variats (public escolar, de CHU, de MECS (maison d'enfants à caractère social), de preson, etc). Qu'a presentat pendent mei d'un an l'emission Fargat a l'ostal sus Òctele.

La musica que'u permet de har viatjar l'occitan en França e au delà de las frontèras dinc a l'aute costat de l'Atlantic. Las lengas que corren lo monde, que's crotzan, que's mesclan e qu'enriqueishen atau totas las culturas.  

Sul camin del feminisme / Sur le chemin du féminisme

Lo libe Sul camin del feminisme qu'ei lo son prumèr obratge. Qu'exprimeish de faiçon documentada e moderada la situacion de las hemnas d'uei e, en particular, las violéncias qui pateishen. Ua prumèra en occitan.