Fabienne Vayrette-Péchali qu'ei neishuda a Castras en 1963. Après estudis universitaris a Tolosa puish a París, que partiscoc víver quauquas annadas a Dakar a Senegal abans de s'installar en Dordonha, on tribalhèc coma ensenhaira especializada. Que demora actuaument en Gèrs.

Lo son encontre dab Pierre Boissière, poèta e cantaire d'Òut e Garona, puish la soa practica deu cant dens lo duò «Las hilhas deu vent» que la decidiscón a causir l'occitan com lenga de còr e d'expression.

Òbra

Fabienne Vayrette-Péchali que publica novèlas dens las revistas Lo Gai Saber e Reclams. Qu'escriu tanben albums entà mainatges e que realiza las illustracions. L'ensemble deus sons racontes, ancorats dens lo monde d'uei, en tot hèr ua bèra part a l'imaginari, que dèishan devinar los sons engatjaments ciutadans. Que participèc en 2024 (actora e script lenga) a la seria Lo clacamion realizada per Eva Cassagnet.

Bibliografia

 Albums pour enfants et adolescents disponibles gratuitement en ligne, avec version audio :

- Lo gat de Xhoanna: clicar entà legir e escotar

- Los hius invisibles: clicar entà legir e escotar

- Ua leçon de vita: clicar entà legir e escotar
 

Literatura

- E viver, Edicions Reclams, 2024

- Copacap, Edicions Reclams, 2026

Extrèit de la novèla "Anna", E víver, pagina 11:

Moscòu. Linha 10. Estacion Pouchkinskaïa. Que preng l’escalator a dreta tà sortir deu metro. Lo hred crud l’estifla. Espia los magazins, los immòbles e non reconeish pas arren. N’ei pas venguda ací dempèi bèra pausa. Ua ventòrla la plega en davant, manca tombar. S’arregaha a la baranda, man esquèrra tetanizada. Qu’a los muscles tibats. De paur e de ponhastrèr mesclats.