Qu’ei lo moment deus concors...

Lo grop CALAM qu’organiza lo concors de literatura de 2020. Que podetz presentar un tèxte abans lo 12 d’abriu, en ua de las categorias qui segueishen :

A – Prèmi de la vila d’Anglet per un conte o ua novèla en pròsa : 600€
B – Prèmi de Poesia de la vila de Baiona : 600€
C – Prèmi Pèir Rectoran de l’Academia Gascona Baiona Ador, reservat aus 15-30 ans : 150€
D – Prèmi Lo Congrès per ua òbra d’adultes en cors / talhèr de gascon : 150€
E – Prèmi de l’Espèr de la vila de Tarnòs, reservat aus dròlles de mensh de 15 ans

L’associacion de bibliotècas deu Lauragués, Le lecteur du Val, que perpausa lo son concors annau de novèlas. Que i a tanben cinc categorias : Adultes, Licèus, Collègis, Mainats, Occitan. Avís: que cau enviar lo son trabalh abans lo 6 de heurèr.

Aquera reedicion de Proverbes de Barèges par J. Rondou instituteur à Gèdre qu’ei era purmèra reedicion sancèra d’ua edicion en tres liberets de 1911-1913 dera Société Ramond e dera Société académique. Que mancava aras autas edicions eth dusau liberet de mau trobar.

De mei qu’avem ajustat eras endevinalhas deth manuscrit dera Monographie de la Vallée de Barèges, un manuscrit vededer sus eth sitie deths Archius departamentaus. En tot 854 articles comentats per Rondou dab quauques ajustèrs.

Ua prefacia de Francis Beigbeder que presenta Jean-Pierre Rondou (1860-1935), era sua vita, era sua obra, naturalista, istorian, etnològue, e particularament en linguistica : lexicologia, toponimia, cultura orala…

Ua referéncia tà retrobar era vita e era filosofia deths nostes davancèrs dera montanha e eth shuc deth beròi parlar de Varètja.

Francis Beigbeder

Proverbes, dictons et devinettes en pays de Barège
Jean-Pierre Rondou
Edicion MonHélios, 2017, 126 p., 19 €.

La navèra deu Dictionnaire du Béarnais et du Gascon modernes de Simin Palay qu'arriba. Referéncia entau gascon, explics segurs e vertadèrs, e referéncia per çò qui ei de las costumas deus ajòus.

Entà soscríver, clicar ací.

Albèrt Peirotet (1931-2009) que neishó a Aubertin, près de Pau. Après estudis a Bordèu, que demora aus Estats Units d'America. Qu'ensenha lo francés a l'universitat de Grand Forks (Dakota deu nòrd). Un còp tornat tà França, qu'ensenha l'anglés e l'occitan a l'universitat de Pau. Qu'escriu dens la revista Reclams e, tanben, que publica uns quants obratges enter los quaus lo prumèr ei Que l'aperavan Colorado, en 1989. Que s'ageish de cinc novèlas. L'accion que's debana au miei deu sègle XXau. Un vent de libertat que boha après la guèrra. Tots que son pertocats, los eròis e los personatges mei convencionaus. Que cau cercar la soa plaça e har cap a las pressions sociaus...

Clarissa Habouzit que'ns conta la soa lectura deu libe. Véser la video.