Dus libes per 14€, Manipòlis e Autas parts.

Manipòlis. Joan-Luc Landi, mei d'un còp premiat aus Calams, que conda, sus un ton esberit e trufandèr, tres novèlas, tres situacions : ua caça deus sanglars peu Vic Vilh, un collòqui viu e ua passejada en Islàndia. A léger peu plaser de la lenga e tà gostar l’amna volatejaira de la Gasconha.

« Hòu, Polinari !... ». Bang ! Bang !
Lo tarrible brut que'u pleè lo cap, un gost de trip mau cueit que'u colava dens la ganurra. « Vedes pas ? Que soi jo ! »

Entà'n saber mei. 

Autas parts. Dens aqueth recuelh, Joan-Loís Baradat qu’auhereish aus ahuecats de poesia quauques beròis tèxtes, sensibles e pregonds.

Non vivi que d’aquò : qu’espèri,

E lo dia e la nueit,

Los uelhs suu camin tostemps vueit.

Atau com aledi, qu’espèri. (Penelòpa)

En 2019, a l'escadença de la 24au edicion deu Concors Calams, 300 participants que concorrón dens ua de las dotze categorias. Aquestas que portavan sus ua produccion literaria, ua arrevirada o ua vidèo e que dependèn deu nivèu de coneishença de la lenga. Un gran trabalh entaus jurats !

Reclams qu'auhereish un abonament aus premiats de la categoria Hèitas, istoèras, condes bracs adultes.

Reclams qu’avia ua operacion de destocatge. Los libes publicats dinc en 2010 que son a mieitat de prètz. Qu’ei l'escadença de completar la vòsta colleccion de Bernat Manciet, d’Eric Gonzales o de Sèrgi Javaloyès o enqüèra de descobrir autors coma Albèrt Peirotet, Eric Rei-Bèthvéder…

Que podetz tanben har ua passejada de cap a l’èst dab L’esquinador de Sèrgi Labatut, Ciutat dins l’Azur de Joan Frederic Brun, Lo cèrcadieu o Lei vidas d’Atanasi de Robèrt Lafont.

Libes que i a que son en occitan, d’autes bilingües, tots que son libes de qualitat. Crompatz-los, crompatz-los un segond còp, auheritz-los !

La Sason Culturau França – Romania 2019 que vòu renovelar l’imatge qui avem los uns deus autes. Dens aqueth encastre, lo Ministèri de la Cultura francés que veng de sortir un jòc vidèo entà descobrir las lengas romanicas e facilitar « l’inter-comprenença ». Que i a ueit lengas : francés, romanés, italian, espanhòu, portugués, catalan, occitan e còrse.

Lo prètzhèit deu jòc qu’es de sauvar Romanica.

"Le monde de Romanica se meurt. Depuis que l'on n’y parle plus qu'une seule langue, tous les habitants s'ennuient, se renferment sur eux-mêmes, fuient et abandonnent leurs cités, en passe de disparaître à jamais sous un épais manteau de nuages.

Vous seuls pouvez ramener la vie et la lumière dans le monde de Romanica ! Laissez de côté vos préjugés et vos doutes et faites renaître la diversité des langues de Romanica pour y ramener la joie et la vie avec tous ses habitants !"